Prebentzioak

Saihestu bizimodu sedentarioa. Ariketa fisikoa aldian behin eginez (astean bizpahiru aldiz onena), behazunak askoz hobeto funtzionatuko du.
Murriztu koipeak. Gehiegizko haragi, hestebete, arrautza, maionesa, gazta ondu, esne oso, txokolate, irin findu, gozo eta alkohol kontsumoak behazuneko arazoak sortzea errazten du.
Gehitu fruten eta berduren kontsumoa. Batez ere alkatxofak, tipula, alberjiniak, zereal integralak, entsaladak eta landare olioak.
Egin kasu landareei. Alkatxofa edo orburuen hostoekin, txikoria belar, boldo nahiz erromeroarekin egindako infusioek molestiei aurrea hartzen lagunduko dizute.
Landare zenbaitek eragin koleretiko-kolagogoa daukate, hots, behazunaren sorrera eta sekrezioa eragiten dute: orburuak, boldoak, txikori belarrak, kurkumak (curryren osagaietako bat da hau), menda belarra, errefaua eta erromeroa (hauxe omen da eraginkorrena behazun-arazoetan).
Edan ur medizinala. Behazunetik sufritzen baduzu, ur sulfatatua edatea komeni zaizu, sodioa nahiz magnesioa duena.
Kontrola itzazu antisorgailuak. Behazuneko arazoak dituzten emakumeek, eta baita familian horrelako aurrekariak dituztenek ere, bestelako metodo antikontzeptiboren bat bilatu beharra daukate, ahotiko antisorgailuen estrogeno gehigarriek gaitza okerragotzea ekarriko baitute.
Eutsi zure pisu egokiari. Obesitateak eta gainpisuak okerrera eramango dute zure egoera.